Karbonadedeig og pasta i form

Med travle dagar må middagslaginga ofte gå kjapt. Denne oppskrifta er enkel og går kjapt, og best av alt: den kan tilberedast dagen i førevegen. Då er det berre å ta den eldfast forma ut av kjøleskapet og putte den i omnen.  Eg fekk oppskrifta med ein god kollega, som fekk den med frisøren sin, som fekk den med…… – ja, du skjønar!

Til seks personar treng du:

2 pakkar kjøtdeig el karbonadedeig

Bandspaghetti (så mykje som du trur du treng)

1-2 beger krydderost

Krydder etter eige ynskje (det kan godt vere tacokrydder)

Raspa kvitost

Ingrediensar til ein raus og god salat

Slik gjer du det:

Kok spaghettien, sil av vatnet, ha spaghettien tilbake i panna og legg over kremosten. La den ligge der og smelte.

Så steikjer du kjøtdeigen og smakar til med krydder etter eige ynskje.

Legg spaghettien i botnen på ei eldfast form, slå kjøtdeigblandinga over og strø ost på toppen. Kvern over litt pepar.

PS! Dersom du skal servere dette neste dag, set du det i kjøleskapet og sparer steikinga til då.

Steik i ovnene på 200 grader i omlag 20 minutt. Sjekk med jamne mellomrom. Osten skal smelte, men ikkje vere for brun.

Lag ein god salat medan retten står i omnen. I dag brukte eg paprika, agurk, tomat, minihjertekål, ruccola, raud løk, fetaost og marinerte kvitløksbåtar.

Ruccola gir ein herleg, krydra smak til salaten!

Eit lite tips: legg opp salaten på eit stort fat, i ei paiform eller liknande. Av ein eller annan grunn ser salat meir delikat ut når det blir servert “flatt” i staden for i ein bolle!

Alle salatar her i huset inneheld oliven. Ikkje kva som helst slags oliven, men oliven med stein som ligg i olje. Det er fireåringen som bestemmer dette! Ho elskar nemleg oliven! Før eg rekk å lage ferdig salaten klarer ho å ete mange oliven.

GOD MIDDAG!